هند سعيد

أنا هند سعيد اتولدت فى الدرب الأحمر وعشت فى الدرب الأحمر وإتجوزت فى الدرب الأحمر وعندى ولدين وبنت ابراهيم وياسين وشهد. زوجي بيشتغل في مجال صب الألبستر وعنده ورشة فى شارع باب الوزير. أنا حاصلة على دبلوم تجارة وعمري 39 سنة.

أولادى كلهم فى المدارس وزوجي بينزل شغله كل يوم من 8 صباحا، فكان لدي وقت فراغ كبير فقررت أن أستغل هذا الوقت شيء مفيد؛ يعنى أستغل وقتي وكمان أساعد فى مصروف البيت. كنت من فترة كبيرة شاركت في تدريب كوروشيه مع مشروع إحياء الدرب الأحمر وعملت منه مشغولات كتيرة لأولادى، ففكرت إننى أروح أسأل تانى فى المشروع عن أى نشاط ممكن أستفيد منه وأستغل وقتي، وقابلت الأستاذ محمد فتح الله  وشرح لى فرصة التدريب المتاحة اللى أقدر اشارك فيها ، فأكتر حاجة حبيتها مهنة الإكسسوارات والحلي؛ عشان كنت أخدت تدريب قبل كده على أساسيات الإكسسوارات (اللضم) فى نادى الدرب الأحمر تبع نقابة الحرفيين، فلما لقيت الاستاذ محمد  شرح لي إن التدريب ده مش هيكون مجرد أساسيات وإنه مشروع تمكين لمدة سنتين ممول من مؤسسة بنك التعمير والاسكان وهيكون فى فترة دمج داخل الورش لمدة 6 شهور، ففرحت جدا بالفكرة وعلى طول عملت إستمارة وحدد معي موعد عشان أعمل إختبار قبل بداية التدريب. وفعلاً حضرت يوم الإختبار وقابلنا الدكتورة ريحانة  المدربة وقالت لي إعملي أى منتج من الخامات اللى قدامك، وفعلاً عملت إسورة من الخرز وقدمتها وبعدين مشيت، وبعد أسبوع الأستاذ محمد  كلمنى وقال لي إننا سوف نبدأ التدريب.

ومن أول يوم كنت مُصرّة إنى أكون متميزة فى التدريب ده عشان أقدر أكمل بقيت المراحل، فتعلمت تشكيل السلك النحاس وعمل بيت الحجر وعملنا قطع نحاس بالنشر وتعلمنا نلحم النحاس ، وكمان نعمل مشغولات مجسمة بالنحاس زى وحدات إضاءة وبراويز مش حلى وبس وكل ده إتعلمته فى 21 يوم تدريب. وبعد كده تم توزيعنا على الورش وكان من حظي إنى رحت ورشة عم مصطفى فى الجمالية وهناك إتعلمت اصول الصنعة وخصوصا فن الربوسيه (التقبيب)، وكمان عم مصطفى علمني إزاى اشترى الخامات بأرخص الأسعار. وبجد اتعلمت منه حاجات كتير فى الصنعة ومكنتش بكتفى بعدد ساعات التدريب داخل الورشة، لا كمان كنت بأخد شغل من الورشة وأعملة فى البيت، وبعد إنتهاء فترة التدريب  قررت أعمل مشروع صغير من اللى اتعلمتة طبعا مكنتش أقدر أعمل بيت نار فى البيت علشان اللحام بتعاع النحاس وكمان التلميع كان هيبقى صعب فى البيت. واتفقت مع محمد (زوجي) إنه يخصصلى مكان معاه فى ورشتة اعمل فيها شغل النحاس وبالفعل عملت كده وطلعت إنتاج متميز ولقيت الأستاذ أمير بيكلمنى وبيقول إن في معرض هنعمله فى الحديقة وجهزت شغل وروحت المعرض وحققت مبيعات حلوة جدا؛ تقريبا بيعت كل الشغل اللى كان معايا وبدأت أصنع تانى وعم مصطفى بياخد مني الإنتاج بتاعي بسعر مناسب.

أنا دلوقتى بأنتج شغل فى البيت وببيعه لأصحابي وجيراني وفعلا قدرت انى أستغل وقتى فى حاجه فعلًا مفيدة وكمان ساعدت فى مصروف البيت من غير ما أقصر مع بيتى وأولادي. وده بيمثل لي نجاح حقيقي وتغيير حصل فى حياتي.