ولاء حسين عبد اللطيف

انا ولاء حسين خريجة دبلوم تجارة  متجوزة وعندى ولد وبنت  مقيمة فى الدرب الاحمر وجوزى  بيشتغل موظف بوزارة الصحة، ونتيجة لارتفاع الاسعار فى كل شيء وثبات راتب جوزى  فكرت انى اشتغل علشان اساعده واسد احتياجات اسرتى ، وبالفعل كنت بداءت ادور على شغل فى محلات ملابس فى وسط البلد عن طريق وحده صحبتى بتشتغل فى نفس المجال بس المواعيد كانت مش مناسبة خالص مع اولادى وخرجهم من المدارس وكمان ومواعيد شغل جوزى  فدورت على شغل تانى وتالت ،وبالصدفة كنت عند وحده صحبتى اسمها اميرة لقيتها بتعمل شغل خيامية وهى فى البيت فقولتلاها اية دة قالتى دة تدريب رحت حضرة فى المشروع بتاع الاغاخان علمونى الصنعة فى حوالى شهرين وبعد كدة بقيت انفذ طلبيات معاهم ومع المدرب كمان وكل ده من غير مدفع اى حاجة بالعكس كانو هما اللى بيوفركل الخامات والمدرب وكل حاجة  وكمان ادونا فلوس فى اخر التدريب علشان نبداء مشروعنا ، فقولتلها طب علمينى قالتى لو عيزة تتعلمى صح اعمل ذى ورحى مؤسسة مظلة  اسالى عن الاستاذ محمد هو اللى ماسك التدريبات هناك وهو هيوجهك صح.

وفعلا تانى يوم جيت هنا على المشروع وسالت عن الاستاذ محمد  وقابلنى وشرح لى  كل حاجة عن التدريب وفكرة المشروع وانة ممول من بنك التعمير والاسكان  وقالى بس لازم تكونى بتعرف تشتغلى اى مهنة باديكى فقولتلها انا اصلا بعرف اشتغل كورشية وتطريز فحدد معايا يوم علشان اجى اختبر فى مع زمايلى وعمالى استمارة واجمل حاجة ان كانت مواعيد التدريب مناسبة اوى مع ظروفى وفعلا جيت فى اليوم اللى حدده  معايا ونجحت فى الاختبار وبداءت التدريب .

وفى فترة التدريب كان عم حنفى المدرب معجب بشغلى اوى وقالى انتى هتبقى حرفية  شطرة لو ركزتى اكتر واهتماتى بالصنعة دى وانا فعلا حبيت الحرفة دى علشان حسيت انها فن جميل وكمان لما عم حنفى  بقى فى التدريب بيقول اسعار كل حتة وازاى اسعرها ليقت فعلا ان الشغل ده ممن يكسبنى وانا قاعدة فى البيت من غير ماخرج اشتغل بره ولا حاجة ،  وطبعا اتعلمت ازاى اشتغل على جميع انواع قماش الخيامية وكمان الكتان وازى اشده على الجلد واساسيات الشغل الاسلامى والفرعونى والرسم الهندسى كل ده فى خلال فترة التدريب

وبعدين تم توزيعنا على الورش علشان مرحلة التدريب بالمعايشة داخل الورش ورحت ورشة الاستاذ محمود سليمان اللى فى قلب سوق الخيامية وهناك مش بس اتعلمت الصنعة على اصولها لا ده انا اتعلمت ازاى اتعامل مع الزبون واقنعة يشترى القطعة وكمان الاستاذ محمود كان بيدنى شغل انفذة فى البيت وبيحسبنى علية وكمان غير البدل الى كان بيتصرف لنا كل شهر من ادارة المشروع

وبعد ما فترة التدريب خلصت استمرت فى الشغل مع الاستاذ محمود وبعمب شغل كتير فى البيت وببيعة فى السوق واصبح دخلى من مهنة الخيامية حوالى 2000 او 2500 جنية شهريا  تقريبا اكتر من راتب جوزى وده حاجة كويسة جدا وكفاية انى بشتغل وانا فى بيتى كام ساعة بس وبخلى بالى من اولادى وده كان نجاح كبير ليه ولاسرتى وانشاء الله هستمر فى الشغل ده وكمان اليومين دول بجهز شغل علشان اعرضة باسمى فى معرض الحديقة وكمان عايزة اقول شكرا لكل اللى ساعدونى علشان واصل للى انا فية دلوقتى وكمان  بنك الاتعمير والاسكان ومؤسسة مظلة  اللى دعمت التدريب بتعنا من من خلال مشروع احياء حرف يدوية قيد الاندثار بالقاهرة التاريخية .